|
زخ الكلام في توصيف اللئام - مابين الحقيقه المرة وورديه الاحلام
مبينه من أولها !!!! ________________________________________ هادا يا جماعه كنت بدي اروح احلق وانتو بتعرفو انا بحب احلق عند مين ؟؟؟ عند حبيب البي ابو معروط - صالون الضفضع الطائر - - بتعرفوووه المفروض هلاء لاني حكيتللكون عنو - ما علينا فكان مين عند ابو معروط كان ابنو معروط مروح من المدرسه وبساعد ابوه عشان شو ما بيطلع لو من الزباين بخشيش يروح يشترى اللي بدو اياه ما علينا فبقولو ابوه ولا معروط احكي للناس قصتك مع عمك ابو الفتايل وانتا صغيرون شو صار معاك وشو قال عنك يعني زكروو بالقصه فبلش معروط يعرط بهالحدوته متل شهرزاد اللي كسرت خاطرو لشهريار وحرمتو بعزءه النسوان وتبديدهون شنقا وقتلا ما علينا بيقول لما كنت صغيرون يا بعد قلبي.... كنت فصح كتير .... بس ما تقلقوا لانو ما استمر هالحكي معاي..... ما انتو بتعرفو ساعات الفصاحه بتكون طيش طفوله لكن مع الايام والعشرة مع المجتمع بتروح لحالها ما شاء الله ومره من زات المرات ... .روحت أنا وبابا ( أبوي لمن لا يعرف المصطلح ).... لنعزي بواحد قريبنا .. .انطرق برصاصة عنص نيعه وهو برقص بعرس( رقصة الحوت الممغوص) .... ولأنو أبوي كان شايفني كتير حربوق وشطور .... فكان يعرفني عالجميع في العزا..... اللي بشدلي خدودي .... وبقوللي: أمور ماشالله .... واللي بقوللي شو اسمك ؟ بقولله معروط الله يخليلك ... بقوللي لسه ما صرت عريط هههههههههههه.... ( النكته اللي سمعتها مليون مره في حياتي ولازم أضحك كل ما واحد بحكيلي اياها ) ............ .واللي بسلخني خماسي عنص وجهي وبقوللي كبران يا عكرته (تستخدم للدلع ومعناها عكروت وتستبدل بكلمات اشد وطئه - حسب صلة القرابة) . العزا كان في البلديه ..... وكان وجهاء البلد على رأس المعزين.... .وعلى رأصهم- راسهوم يعني - .... ( لانو بهزولو ذنب كتير ) ... .نائب المنطقة أبو الفتايل البمب واللي هو اقطاعي كبير فاز بالانتخابات بعد ما كت نص قروشه....واشترى صوبات.... .وعبا خزانات مي واجرار غاز....... ...ووظف مراسلين.... .وفلا قرود .. وظله يرشق الحارات مناسف وكنافه لسخسخت... .ومشي بعطوات ....وأعراس... وعزيات ... .حتى الطهور ما كان يفوته ...... لدرجة انو اضطر يصلي ( اتصوروا التضحية؟ ) عشان الناس تنتخبه... ..وبالأخير فاز بفارق نص صوت..................... وبعد ما وصل المجلس التم على أكمن واحد من طينته وعمل حزب معارضة (شريفة ؟؟؟) مكون من شلة مستوزرين. أخذني أبوي ليعرفني عليه : أبوي: كيفك أبو الفتايل بيك؟ أبو الفتايل : هلا .... بأبو ....بأبو .....اياد؟ .... كيف حالك؟ أبوي: معروط ....معروط....أبو معروط أنا يا سيدي.. أبو الفتايل : أبو معروط.... الله يلعنو الشيطان ( بسب عليه للتمويه مع انو صاحبو ).. .شكلو الواحد بلش يختير ههههههههههه هادا هو ابو الفتايل بحكي عن حالو ( مع اهتزاز كرشه وطيران زر من قميصه ما قدر يتحمل شدة الضغط).... . ومع ضحك مجموعة التحف اللي جايبهم معاه. أبو الفتايل : ومين هالأمور اللي معك.....معروط؟ أبوي: هادا أبو العرط كلوو .... معروط ابني...... أبو الفتايل : ماشالله .....تعال عمو .....تعال....... هات لبوسك يا حلو. طبعا أنا شوفت منظرة .....خف ضبان عقلي.... كرشه قدامة نص متر .... بشخور من كثر النصاحة .... .وشواربة زي المكنسة الخشنة.... .ولسة في حبتين رز من سدر المنسف اللي سلخه _وهو بقول متغدي ...ما تغصبوني_ عالقات بالسكسوكة .................وكملها راح اتدرع قبل ما يكمل الجملة ............. شو بتعملوا بهالحالة ؟ الحمد لله انو كنت صغير وقتها وما حدا بلوم علي ....وتذكرت مقولة الشاعر ربحي رباح : سييييبك.....ترالالالالا روحت اتخبيت ورا أبوي.....(لايش الأبو موجود؟؟؟ )..... واطلعت من ورا ظهره. أبو ي: معلش أبو الفتايل بيك .... شكلو الولد مستحي شوي. أبو الفتايل : بسيطة..... بسيطة .....يا حلو..... بأنو صف انت؟ أنا : شو دخلك؟ أبوي: وله؟؟؟؟؟ أنا :في الصف التاني جيم............ أبو الفتايل : ( السؤال السرمدي اللي بنسأل لكل الولاد ) وشو رح تطلع لما تكبر؟ أنا : وزير!!!! أبو الفتايل ( وثلة من الحضور ) ايييييييييييييييييه ههههههههههههههههههههه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟. ال يعني انبسطو من الرد أبوالفتايل : وليش بدك تطلع وزير؟ ( مع تطليعة عشلة الغنم المرافقة لحضرته) أنا : عشان اساعد الناس اللي مش ملاقين ياكلوا ..... أبوالفتايل: يا حرررررررررررررررام ....... هههههههههههه ليش تستنى لتكبر .... .بتقدر تساعدهم هلاء!!!! أنا : كيييييييف؟؟ أبو الفتايل :......... شو رأيك تمسحلي السيارة و أعطيك 5 نيرات.... .تروح تعطيها لواحد فقير. أنا ( بعد تردد ): ماشي. أبوي : وله ياللي ما بتستحي!!! أبو الفتايل مع غمزة لأبوي ............... بعد اذنك يا بو فادي ( لا حظو انو البمب ذاكرته شطب) نسي انو ابو معروط خليه يروح ........... أبوي: بتمون يابو الفتايل ......روح وله........ ما اتزحزحت حتى أخذت ال 5 نيرات .... بعد ما صار وجه أبوي أحمر وقرصني ميت قرصة .... واتحلفلي بأشارة ايده ( الساعة 3 عالدوار ) مع صكه مرعبة عسنانو ..........بتخيل كلكون مريتو بهالتجربه المرعبه .وبرضة ظليت متنح. وروحت لأمسحلو الشبح ..... وقبل ما أبلش.... .لقيت يوسف المسخم في الطريق .... فكرت في الموضوع ..قلتلة ... .وله يوسف تمسح السيارة وتوخذ نص ليرة ؟ انعجق و قاللي ماشي ....عراسي ياسيدي... .أمرك ( المسكين واقع من مكوك ديسكفري)..... وبلشت أحرث عظهره...... اطلعت وراي الا أبوي و أبو الفتايل بطلعوا علي... وفارطين من الضحك. ..و أبو الفتايل بقول لأبوي: هههههههههههههههههههههههههه ..... ابنك مكانه مش بوزارة...................... هالنمس مكانه.................. , , , , , , , , , (معانا في المعارضة الشريفة) : المقالة من نسج الخيال ولا تمت لا للحكومة ولا للمعارضة ولا لانقابه الحلاقين بصله . والشخصيات الواردة في الحدوته هي صحيح شكلا ****ه وطنيه لكنها من تجميع تايوان وليست اصليه ولا يوجد لها قطع غيار عدى حبيب البي ابو معروط والمستنسخ منه معروط بس |
اشكرك اخى على الطرح
دمت بخير |
هههههه رووووووعه
جد رووووعه اممممم حبيييييت :) |
مشكوووووور والله يعطيك الف عافيه
|
مشكور ع الاضافه العطره
تحيااااااتي |
مشكوووووور والله يعطيك الف عافيه
|
ههههههه
يسلمو المتمرد استمتعت دمت بخير |
مشكور ويعطيك الف عافيه
اخي المتمرد ود اليك |
|
اقتباس:
وبخير دمت مليون هلا تقديري واحترامي |
| الساعة الآن 08:32 AM |
Powered by vBulletin™ Version 3.8.7
Copyright © 2024 vBulletin Solutions, Inc. All rights reserved.
wsport
adv helm by : llssll