ليش زعلان يا ختيار
كنت بدك دولة ، صار عنا دولتين .وحدة في غزة والثانية في الضفة.. اللاجئين زي ما همة بس اتشردو كمان مرة وقتلهم الجوع....، ، غزة اتدمرت الضفه حدث ولا حرج . المستوطنات زادت شوي مش كثير الضعف تقريبا ،
بعدنا بنفاوض.. لسا قدامنا اكم سنة وبعد كل المفاوضات قرار ضم اجزاء من الضفة الغربية ..
ليكون زعلان عشان شعبك نسيو انهم شعب الجبارين. ولحقو الكرتونة وشوال الطحين ؟ تزعلش
ولا زعلان عشان بعد ١٦ سنة ما عرفنا مين حطلك السم ؟؟لسا لجنة التحقيق ما خلصت بحث وتحري على مدار الساعة ليش زعلان يا ختيار ليكون عالقدس ؟ القدس هدية ترامب لإسرائيل وكمان العرب حضروا مراسم التسليم ..... يا ختيار صارت الجرذان تطلع من جحورها وتسب وتغلط علينا ليش زعلان يا ختيار ؟
إشتقنالك وإشتقناااا لكلماتك إلي كانت تنسينا همومنا... لما كنت تقول عالقدس رايحين شهداء بالملايين ، والي مش عاجبه يشرب من بحر غزة .
اشتقنالك لما كنت تعصب عشان ما حد بعصب اليوم ضاعت قضيتنا وهم بصمت لا حول ولا قوة... ليييش زعلان يا ختيااار ؟
بتتذكر يا ختيار لما مرضت وركبت الطيارة على فرنسا للعلاج
طارت فيك الطيارة وطار معها الوطن .
رحمة الله عليك يا ختيار